Jeremiah 31

1“Ngalesosikhathi,” kutsho uJehova, “ngizakuba nguNkulunkulu wezizwana zonke zako-Israyeli, bona bazakuba ngabantu bami.”

2UJehova uthi: “Abantu abasilayo enkembeni bazathola umusa enkangala; ngizakuzanika u-Israyeli ukuphumula.”

3UJehova wabonakala kithi kudala esithi: “Ngikuthandile ngothando olungapheliyo; ngikuhole ngesisa esikhulu.

4Ngizakwakha njalo uzakwakhiwa kutsha futhi, wena Israyeli Ntombi emsulwa. Uzathatha amagedla akho futhi uphume uyegida labathokozayo.

5Uzalima izivini zakho futhi emaqaqeni aseSamariya; abalimi bazazilima badle izithelo zazo.

6Kuzakuba losuku lapho abalindi bezamemeza phezu kwamaqaqa ako-Efrayimi bathi, ‘Wozani, kasiyeni eZiyoni, kuJehova uNkulunkulu wethu.’ ”

7UJehova uthi: “Mhlabeleleni uJakhobe ngokuthokoza; nqongolozelani izizwe ezidumileyo. Yenzani ukudumisa kwenu kuzwakale, lisithi, ‘Awu Jehova, bahlenge abantu bakho, insalela ka-Israyeli.’

8Khangelani, ngizababuyisa bevela elizweni lasenyakatho, ngibaqoqe emikhawulweni yomhlaba. Phakathi kwabo kuzakuba leziphofu labaqhulayo; abesifazana abazithweleyo labahelelwayo; ixuku elikhulu lizabuya.

9Bazabuya bekhala; bazakhuleka lapho ngibabuyisa. Ngizabaholela ezihotsheni zamanzi endleleni eyendlalekileyo lapho abangayikukhubeka khona, ngoba nginguyise ka-Israyeli, njalo u-Efrayimi indodana elizibulo lami.

10“Zwanini ilizwi likaJehova, lina zizwe; limemezeleni emazweni angaselwandle khatshana lithi: ‘Yena owahlakaza u-Israyeli uzamqoqa njalo uzakwelusa umhlambi wakhe njengomalusi.’

11Ngoba uJehova uzamhlenga uJakhobe, abakhulule ezandleni zalabo abalamandla kulabo.

12Bazakuza banqongoloze ngentokozo ezinqongeni zeZiyoni; bazathokoza ngokuphana kukaJehova – ngamabele, langewayini elitsha kanye lamafutha, ngamazinyane ezimvu langamathole ezinkomo. Bazakuba njengesivande esithelelwa kuhle, njalo kabasayikuba losizi futhi.

13Izintombi zizagida njalo futhi zithabe, enzenjalo amajaha labadala. Ngizaguqula ukukhala kwabo kube yikuthaba; ngizabapha induduzo lentokozo esikhundleni sosizi.

14Ngizasuthisa abaphristi ngokunengi, labantu bami bazasutha ngokuphana kwami,” kutsho uJehova.

15Nanku akutshoyo uJehova: “Ilizwi liyezwakala eRama, ukulila lokukhala okukhulu, uRasheli ukhalela abantwabakhe esala lokududuzwa, ngoba abantwana bakhe kabasekho.”

16Nanku akutshoyo uJehova: “Bamba ilizwi lakho ungakhali, lamehlo akho angehlisi izinyembezi ngoba umsebenzi wakho uzathola umvuzo,” kutsho uJehova. “Bazabuya bevela elizweni lesitha.

17Ngakho kulethemba ezinsukwini zakho ezizayo,” kutsho uJehova. “Abantwabakho bazabuyela elizweni labo.

18“Ngikuzwile impela ukukhala kuka-Efrayimi esithi: ‘Wangitshaya njengethole elibhedayo, njalo sengajeziseka. Ngibuyisa, njalo ngizabuya, ngoba unguJehova uNkulunkulu wami.

19Emva kokuba ngedukile, ngaphenduka; emva kokuba sengizwisisile, ngatshaya isifuba sami. Ngaba lenhloni ngadumazeka ngoba ngangilehlazo lasebutsheni bami.’

20U-Efrayimi kasindodana yami ethandekayo, umntanami engithokoza ngaye na? Lanxa ngihlala ngikhuluma kubi ngaye ngisamkhumbula. Ngakho inhliziyo yami iyamlangazela; ngilesihawu esikhulu kuye,” kutsho uJehova.

21Beka izitshengiso zomgwaqo; umise lezinsika zeziqondiso. Nanzelela umgwaqo, indlela ozahamba ngayo. Buya, we Ntombi emsulwa Israyeli, buyela emadolobheni akho.

22Koze kube nini ulokhu uzulazula, wena ndodakazi engathembekanga na? UJehova uzadala into entsha emhlabeni – owesifazana uzavikela indoda.”

23UJehova uSomandla, uNkulunkulu ka-Israyeli uthi, “Lapho ngibabuyisa bevela ekuthunjweni, abantu abaselizweni lakoJuda lasemadolobheni alo bazawasebenzisa futhi amazwi la athi, ‘UJehova akubusise wena ndawo yokuhlala elungileyo, wena ntaba engcwele.’ 24Abantu bazahlala ndawonye koJuda lasemadolobheni akhona wonke – abalimi kanye lalabo abazulazulayo lemihlambi yabo. 25Ngizaqinisa abadiniweyo ngisuthise abangelamandla.”

26Lapho-ke ngaphaphama ngakhangela indawana yonke. Ubuthongo bami babubemnandi kimi.

27“Izinsuku ziyeza,” kutsho uJehova, ‘lapho engizahlanyela khona indlu ka-Israyeli lendlu kaJuda lenzalo yabantu lezinyamazana.

28Njengoba ngabalinda ukusiphuna lokudiliza, ukuchitha lokubhubhisa kanye lokuletha umonakalo, ngokunjalo ngizabalinda ukwakha lokuhlanyela,” kutsho uJehova.

29“Ngalezonsuku abantu kabasayikutsho ukuthi, ‘Oyise badle amavini amunyu, ngakho amazinyo abantwana asetshelela.’

30Esikhundleni salokho, umuntu wonke uzafela izono zakhe; loba ngubani odla amavini amunyu – awakhe amazinyo azatshelela.

31“Isikhathi siyeza,” kutsho uJehova, “lapho engizakwenza khona isivumelwano esitsha lendlu ka-Israyeli kanye lendlu kaJuda futhi.

32Kasiyikuba njengesivumelwano engasenza labakhokho babo lapho ngababamba ngesandla ukubaholela ngaphandle kweGibhithe, ngoba bephula isivumelwano sami, lanxa ngangingumyeni wabo,” kutsho uJehova.

33“Isivumelwano engizasenza lendlu ka-Israyeli ngemva kwalesosikhathi yilesi,” kutsho uJehova. “Ngizafaka umthetho wami ezingqondweni zabo, ngiwulobe lasezinhliziyweni zabo. Ngizakuba nguNkulunkulu wabo, bona bazakuba ngabantu bami.

34Umuntu kasayikufundisa umakhelwana wakhe, kumbe umuntu afundise umfowabo esithi, ‘Yazi uJehova,’ ngoba bonke bazangazi, kusukela komncane wabo kusiya komkhulukazi,” kutsho uJehova. Ngoba ngizabathethelela ububi babo, ngingazikhumbuli futhi izono zabo.”

35Nanku akutshoyo uJehova, yena obeka ilanga ukuba likhanyise emini, omisa inyanga lezinkanyezi ukuba kukhanye ebusuku, onyakazisa ulwandle ukuze amagagasi alo ahlokome – uJehova uSomandla yilo ibizo lakhe, uthi:

36“Uma izimiso lezi zinganyamalala ebusweni bami,” kutsho uJehova, “kulapho lenzalo ka-Israyeli ingacina ukuba yisizwe phambi kwami.”

37UJehova uthi: “Uma amazulu phezulu engalinganiswa lezisekelo zomhlaba ngaphansi zihlolwe, kulapho engingayilahla khona yonke inzalo ka-Israyeli ngenxa yakho konke abakwenzileyo,” kutsho uJehova.

38“Izinsuku ziyeza,” kutsho uJehova, “lapho idolobho leli ngizalakhelwa kutsha kusukela eMphotshongweni waseHananeli kusiya eSangweni leNgosi. 39Intambo yokulinganisa izasukela lapho iqonde eqaqeni lweGarebi ibe isijikela eGowa. 40Isigodi sonke lapho okulahlelwa khona izidumbu zabafileyo lomlotha, lawo wonke amasimu kusiyafika esigodini seKhidroni ngasempumalanga kusiyafika ejikweni leSango leBhiza, kuzakuba ngcwele kuJehova. Idolobho kaliyikusitshunwa futhi loba lidilizwe.”